బంధ కవిత్వంలో దైవ బలం.( కంద గీత గర్భ ఉత్పలమాల)

యుద్ధము నందు సైనికునకు సాధనము దైవ శక్తియే.

కం:-

రణమందు సాధనము త

త్వ నవాశ్రిత దైవ శక్తి వందారునకున్!

రణమందటన్ కుజన రీ

తి నశింపగు గొప్పగాను దేవా! రమణా!

భావము:-

ఓ పరమాత్మా! ఓ వేంకట రమణా! వందనీయునకు యుద్ధ రంగమున తత్వ నవాశ్రిత మైన దైవ శక్తియే సాధనముకదా! ఆక్కడ యుద్ధ రంగమున కుజనుల యొక్క పద్ధతి గొప్పగా నశించి పోవును కదా!

దైవ మనెడి ధనమే నిజమైన ధనము.

తే.గీ:-

ధనము తత్వ నవాశ్రిత దైవ శక్తి.

ధనము దర్పిలఁ గొల్పును తంత్ర శక్తి.

కుజన రీతి నశింపగు గొప్పగాను.

సుజన వాణి యదార్థము. శోభనిచ్చు.

భావము:-

ధనమనగా తత్వ నవాశ్రితమైన దైవ శక్తియే కదా! అట్టి ధనము తంత్ర శక్తిని దర్పిల తగిన విధముగా కలుగఁ జేయును. అట్టి ధనము కలవానిలో కుజన రీతి పూర్తిగా నశించి పోవును. ఇది సుజన వాణి. సత్యమైనది. ఇది తప్పక శోభను కలుగఁ జేయును.

అవధానికి ధారణా శక్తి దైవ బలమే.

కంద గీత గర్భ ఉత్పలమాల:-

‘ధారణమందు సాధనము తత్వ నవాశ్రిత దైవ శక్తి వం

దారునకున్ సుబోధనము దర్పిలఁ గొల్పును తంత్ర శక్తియున్.

ప్రేరణమందటన్ కుజన రీతి నశింపగు గొప్పగాను. దే

వా! రమణా! కనన్ సుజన వాణి యదార్థము. శోభనిచ్చుగా!

భావము:-

ఓ దేవాదిదేవా! ఓ వేంకట రమణా! నమస్కరింపఁ దగిన సద్గుణ సంపన్నునకు అవధారణము చేయు సమయమందు సాధనమైనది తత్వ నవాశ్రితమైన దైవశక్తియే కదా తంత్ర శక్తియు; సుబోధనమును దర్పిలు నట్లు కలుగఁ జేయును! అక్కడ ఆ సమయమున ప్రేరణమును పొందును. దుష్టుల విధానము నశించి పోవుట జరుగును. ఆలోచించి చూచినట్లైతే సుజనుల యొక్క మాటలు సత్యము సుమా! 
అవి తప్పక శోభను కలుగఁ జేయును కదా!

జైశ్రీరాం. 

జైహింద్.

Print this post