ఆంధ్రామృతం ద్వారా మీ కవితామృతంతో గణపతిని అభిషేకించండి.

జైశ్రీరామ్.

నిర్విఘ్నమస్తు.

సుహృద్భావ సమృద్ధులారా! మన బొజ్జ గణపయ్య మన ముందుకు వచ్చెస్తున్నాడు. మీలో నిబిడీకృతమై ఉన్న ప్రేమోద్భాసిత కవితామృత ధారలతో మన బొజ్జ గణపయ్యను అభిషేకించండి. మీ జీవనాన్ని నిర్విఘ్నం చేసుకోండి.

ప్రథమ సుపూజ్య విఘ్నపతి, భక్తుల పాలిట కల్పవల్లియై

మధుర మనోజ్ఞ జీవన సుమాధురి నందగ జేసి, ప్రేమతో

వ్యధలను బాపుచున్,  సుగుణ భాగ్యమొసంగుచు, బ్రోచు భక్తులన్.

మధుర కవిత్వ వైఖరిని, మాన్యుని, విఘ్న పతిన్ నుతించరే!

గౌరవ మొప్పగా తలచి, గడ్డిని గైకొని పూజ సేయ, సం

సారమహాంబుధిన్ తరియ సాయము చేయుచు కాచు దైవమే

చేరగ వచ్చె మీ గృహము క్షేమము గొల్పగ. భక్తి పూర్ణులై

గారవ మొప్ప  పద్యశతకంబుల పుష్పములిచ్చి గొల్వరే!

శ్రీయాంధ్రామృత పాన లబ్ధ కవితా శ్రీమంతులే! భూమిపై

మాయా దూర విశేష బోధ కలితామందాననోద్భాసులే!

మీ యాతిథ్యము స్వీకరింప కృపతో మీ యింటికే వచ్చు, సు

జ్ఞేయున్ విఘ్నపతిన్ కవిత్వ సరణిన్  కీర్తింపలేకుందురే?

ఒక్కొకరొక శతకంబును

మక్కువతో వ్రాయ గలగు మాన్యులు మీరల్.

లెక్కకు మించుగ పద్యము

లక్కజముగ వ్రాసి, పంచు డాంధ్రామృతమున్.

నాకోరిక మన్నింపుడు.

నే కోరను మిమ్ము ధనము. నిర్విఘ్నముగా

శ్రీకారము చుట్టి కవులు

ప్రాకటముగ కవిత లల్లి, పంపుఁడు వ్యాఖ్యల్.

మీ అపురూపమైన సమాధానములకై ఎదురు చూస్తూ, నమస్కారములతో 

మీ రామ కృష్ణా రావు.

జైహింద్

Print this post