మేలిమి బంగారం మన సంస్కృతి 119.

జైశ్రీరామ్.

శ్లో:-

దీపనం వృష్య మాయుష్యం - స్నానమోజోబలప్రదః.
కండూ మలశ్రమ స్వేద - తంద్రాయృడ్దాహపాపనుత్.
గీ:- స్నానమునుఁ జేయ జఠరాగ్నిచక్కఁ బెరుగు,
ధాతు పుష్టి, దీర్ఘాయువు, తగిన బలము,
తేజమొలయు. దురదఁ బాపు దివ్యముగను
మురికి, చెమట, దప్పిక, శ్రమ, మొద్దుతనము
పాప చింతన నశియించు. ప్రభను గొలుపు. 
భావము:-
స్నానము వలన జఠరాగ్ని దీపనము, ధాతు పుష్టి, దీర్ఘాయువు, తేజస్సు, బలము కలుగును. దురదలు, మురికి, బడలిక, చెమట, సోమరితనము, దప్పిక, పాప చింతన నశించును.
స్నానము చేసే నీటిని ఉద్దేశించి ఈ క్రింది శ్లోకము చదువుతూ ఆ గంగలో ఓంకారాన్ని వ్రాసి ఆ నీటితో స్నానం చేయాలి.
శ్లో:-
గంగేచ, యమునేచ, గోదావరీ, సరస్వతీ, 
నర్మదా, సింధు, కావేరీ జలేస్మిన్ సన్నిధింకురు.

శ్లో:-పంచ స్నానాని విప్రాణాం కీర్తితాని మహర్షిభిః |

ఆగ్నేయం వారుణం బ్రాహ్మ్యం వాయవ్యం దివ్యమేవచ || 

ఈ స్నానము 5 విధములు.

౧.నిత్య స్నానము:-

ప్రతీ రోజూ చేసే స్నానము.

౨.నైమిత్తిక స్నానము:-

గ్రహణాది నిమిత్తముగా చేసే స్నానము.

౩.కామ్య స్నానము:-

కోరికతో పర్వదినాలలో చేసే స్నానము.

౪.ముఖ్య స్నానము:-

నీటితో చేసే స్నానము.

౫.మంత్రం లేదా బ్రాహ్మ్య స్నానము:-

నమకాది మంత్ర యుక్తముగా చేసే స్నానము.

ఈ స్నానము 2 రకములు. 

౧.వారుణ స్నానము - వారి అంటే నీరు. నీటితో చేసే స్నానము.

౨.గౌణ స్నానము. - నీరు లేకుండా చేసే స్నానము. 

ఇది 5 రకములు.

౧.ఆగ్నేయస్నానము:-

(విభూతి స్నానము)

శ్లో:-శ్రీకరంచ పవిత్రంచ శోకరోగ నివారణం|
లోకే వశీకరణం పుంసాం భాస్మత్రైలోక్య పావనం|| 
మగవారికి సంపదలను చేకూర్చే, పరమ పవిత్రమైన,  బాధలను నివారించే,  అనారోగ్యాలను పోగొట్టే,   అందరినీ వశంలో ఉంచుకునే విధంగా చేసే ఈ విభూతి ముల్లోకములందును పవిత్రమైనది.

౨.భౌమస్నానము:-

(మృత్తికా స్నానము)

౩.వాయవ్యస్నానము:-

(రేగుతున్న గోధూళితో స్నానము)

౪.దివ్యస్నానము:-

(వర్షములో తడిసి చేసే స్నానము)

౫.మానసిక స్నానము:-

(దైవ చింతనచేస్తూ, కామాది అరిష్డ్వర్గాలు అనే మాలిన్యాలను వీడుట. ఇదియే నిజమైన స్నానము. బాహ్యంగా జలంతో చేసే స్నానం కేవలం కాకి స్నానమే ఔతుంది)

జైహింద్.

Print this post