గణనీయంబగు భాషలందు తెలుగున్ గాంచంగ మేల్మేలు.. తాన్ విన సొంపై , ప్రకటించు భావ సరళిన్ దృప్తిన్, విశేషించి పల్ ఘన కావ్యామృత సంవిధాన మహిమల్ గాంచంగ నాంధ్రామృతం బను యీ బ్లాగును గొల్పి యుంటి. కనుడీ ! ఆంధ్రామృతం బందుడీ ! .

29, మే 2019, బుధవారం

హనమజ్జయంతి శుభాకాంక్షలు

జైశ్రీరామ్
జైశ్రీమన్నారాయణ
ఆర్యులకు శ్రీ హనుమజ్జయంతి శుభాకాంక్షలు.

దండక గర్భ సీసమాలిక.

శ్రీఆంజనేయా! ప్రసిద్ధప్రభావంబు
తో నిల్చి రక్షించు తోడు నీవె.

నీ పేరు విన్నన్ బునీతంబులౌ జన్మ
ముల్ దేవ! రావేల? పూజ్యపాద.

నీపాదపద్మమ్ములేపారఁ జూడన్ బ్రభావంబు కన్పించు వరలఁ జేయు.

శ్రీరామదూతా ప్రసీద ప్రసీదంచు
నిన్ వేడుదున్ రమ్ము నీడవగుము.

శ్రీరామ నామంబు నోరారఁగా పల్కు
నన్బ్రోచుదీవయ్య నయసుచరిత.

మాకున్ బరంబిచ్చు మాభాగ్యమున్ బెంచు
భక్తిన్ బ్రసాదించు బ్రహ్మచారి.

మాలోని భీతిన్ సమస్తంబు పోఁగొట్టి
మమ్మేలు మాస్వామి మహిత తేజ.

సీతామహాసాధ్వి మాతన్ పతిన్ జేర్చి
తీవే. నమస్తే. సుధీ నమామి.

గీ. స్వార్థరహితుల సుకవుల వర్ధనమును
చేయ వేడుదు నిన్ను నే చేయుమయ్య.
రామచంద్రుని సత్కృప మేముకనఁగ
ప్రేమతోఁ జేసి రక్షించు నీమముగను.

జైశ్రీరామ్
జయహనుమంతా

విధేయుఁడు
చింతా రామకృష్ణారావు.
జైహింద్.
Print this post

1 comments:

రాజేశ్వరి నేదునూరి చెప్పారు...

నమస్కారములు
హనుమత్జయంతి సందర్భముగా అందరికీ శుభాకాంక్షలు

వ్యాఖ్యను పోస్ట్ చెయ్యండి

ఆంధ్రామృత బ్లాగ్ వీక్షకులకు ధన్యవాదములు.