పండిత నేమాని చేసిన శ్రీ మానా ప్రగడ శేషశాయి గురు స్తుతి.

గురు స్తుతి

శా. శ్రీనిష్ఠానిధి, వాగ్విభూషణుడు, రాశీభూత కారుణ్యమున్

జ్ఞానానంద మహాబ్ధి, శిష్యగణ విజ్ఞానానుసంధాయి, శ్రీ

మానాప్రగ్గడ శేషశాయి, బుధ సమ్మాన్యుండు, సద్భక్తితో

నేనా సద్గురు పాదపద్మ యుగళిన్ సేవింతు నశ్రాంతమున్

మ. నను సౌహార్దము నిండు దెందమున సన్మానించె, వాణీ స్వరూ

పునిగా జెప్పుచు గూర్చె గౌరవము, నా పొత్తమ్ములో పద్యముల్

మనమారన్ విని చాల మెచ్చుకొనె, నా మానాప్రగడ్వంశ చం

ద్రుని, చంద్రాతప కీర్తిమంతు వినుతింతున్ వాగ్లతాంతాళితోన్

తే.గీ. అతని తలపులు లోక శ్రేయస్కరములు

అతని పలుకులు ప్రథిత విద్యాంకురములు

అతని కృతులు సాహిత్య లోకాధ్బుతములు

శ్రిత హితార్థ ప్రదాయి శ్రీ శేషసాయి

ఇట్లు 

నేమాని రామజోగి సన్యాసి రావు

Print this post