శివ శివ యన రాదా? శివ నామము చేదా?

ఓం నమశ్శివాయ!

జైశ్రీరామ్.
ప్రియ సుస్వభావులారా! 
శివ అను రెండక్షరముల ప్రాశస్త్యమును మనము గమనించినచో ఆశ్చర్యము పొందకమానము.
ఈ క్రింది శ్లోకాదులను చూడుఁడు.
శ్లో:-
విద్యాసు శ్రుతి రుత్కృష్టా. రుద్రైకాదశినీ శ్రుతౌ.
తత్ర పంచాక్షరీ, తస్యాం శివ ఇత్యక్షర ద్వయమ్.
గీ:- 
విద్యలందున మేలౌను వేద విద్య.
వేదముల రుద్రములు మేలు విశ్వమునను.
భద్ర పంచాక్షరియె మేలురుద్రములను.
"శివ"  యె పంచాక్షరిని మేలు శ్రియముఁ గొలుపు.
తా:- 
విద్యలన్నిటిలోను వేదములు ఉత్కృష్టమైనవి. వేదములందు ఏకాదశ రుద్రములుత్కృష్టము. అందు పంచాక్షరీ ఉత్కృష్టము. ఆ పంచాక్షరియందు " శివ " అను రెండక్షరములు ఉత్కృష్టమైనవిగా గ్రహింప వలెను.
ఇంతటి మహోత్కృష్టమైన శివ అను అమృతోపమానమైన రెండక్షరములను మనము నోరారా పలుకుట ఎంతటి సత్ఫలము నిచ్చునో గ్రహింపకపోలేము. మరెందుకు ఆలస్యము? భక్తి, శక్తి, యుక్తి, ముక్తి ప్రదమైన శివ నామమును నిరంతరము హృదయమున పలుకనలవడితిమేని, తత్ఫలము కూడా మనము పొందుదుమనుటలో సందేహము లేదు.
జైహింద్.

Print this post