శ్రీచక్రబంధ తేటగీతి. రచన. ... శ్రీవల్లభ.

జైశ్రీరామ్.

 తే.గీ. :    

మహిత కీర్తుల శ్రీకన్య మాన్యశ్రీని

నయముజేకూర్చు శ్రీకాంత నవ్యశీల

ముదిత రక్షించు శ్రీలిచ్చి ముచ్చ టించు

మము ననాముల నిశ్చల మౌచు లేమ

 

భావము :  రహితకీర్తులతో విరాజిల్లు మాన్యశ్రీయగు శ్రీ కన్య నయమును చేకూర్చును.  నూతనమగు సంపదలతో సంతసించి ముచ్చటిల్లుచు శ్రీలిచ్చి అనాముకులమగు మమ్ములను  రక్షించును.

 

V.A.N. Murthy

జైహింద్.

ప్రియః ప్రజానాం దాతైవ. ... మేలిమిబంగారం మన సంస్కృతి.

 జైశ్రీరామ్.

శ్లో.  ప్రియః ప్రజానాం దాతైవ - నపునర్ద్రవిణేశ్వరః |

ఆగచ్ఛన్ కాంక్షతే లోకైః - వారిదో న తు వారిధిః ||

(భోజచరిత్ర)

తే.గీ.  ప్రజలకిల దాతయే కనఁ బరమప్రియము,    

విత్తవంతుఁడు కాదిలన్ బ్రియము ప్రజకు, 

వారిదంబన్న ప్రియమిల ప్రజలకిలను,

వారిధిని కోరరెన్నడున్ నీరు కోరి. 

భావము. ప్రజల పాలిట దానం చేసే (ఇచ్చే) దొరయే కావలసినవాడు. 

ధనాధిక్యత గలవాడు కాదు. నీటినిచ్చే మేఘాలకొఱకు అందరూ ఎదురుచూస్తారు 

కానీ సముద్రము కొఱకు కాదు.

జైహింద్.

దూరదర్శన్ .. సన్మార్గం లో బ్రహ్మశ్రీ ఒజ్జల శరత్ బాబు.

జైశ్రీరామ్.

జైహింద్.

ఆశాయా దాసా యే. ... మేలిమిబంగారం మన సంస్కృతి.

జైశ్రీరామ్.

 శ్లో.  ఆశాయా దాసా యే - దాసాస తే సర్వలోకస్య।

ఆశా దాసీ యేషాం - తేషాం దాసాయతే లోకః॥

తే.గీ.  దాసులగువార లాశకున్, దాసులగుదు

రెల్లలోకములకు, నట్లె యెల్ల లోక

ములును దాసియౌ నాశయే పూజ్యులయిన

వారలకు దాసి యైనచో,  భక్తవరద!

భావము.  ఆశకి ఎవరైతే దాసులో వారు సమస్త లోకానికీ దాసులే. ఆశ ఎవరికైతే 

దాసియో అటువంటి వారికి సమస్త లోకమూ దాసియే. 

  జైహింద్.

యః సతతం పరిపృచ్ఛతి.. ... మేలిమిబంగారం మన సంస్కృతి.

 జైశ్రీరామ్

శ్లో.  యః సతతం పరిపృచ్ఛతి

శృణోతి సంధారయత్యనిశమ్ |

తస్య దివాకరకిరణైః

నలినీవ వివర్ధతే బుద్ధిః ||

(పంచతంత్రం)

తే.గీ.  ఎవఁడు ప్రశ్నించుచుండునో యెల్లవేళ

లందు, వినుచుండునో, నిత్య మరయుచుండు

నో యతనిబుద్ధి రవికాంతి నొందినట్టి

పద్మమట్టుల వికసించు, భక్తవరుఁడ!

భావము.  ఎవరు ఎల్లపుడూ ప్రశ్నిస్తాడో, చెవులారా వింటాడో మరియు ఎల్లపుడూ 

చక్కగా గ్రహిస్తాడో అతని బుద్ధి సూర్యకిరణాలతో తామరపుష్పం ఎలాగో అలాగే 

వృద్ధిచెందును.

జైహింద్.

కార్తీకవనభోజనాల ప్రాశస్త్యము. శ్రీమతి బీ. సుశీలదేవి భాగవతారిణి.

జైశ్రీరామ్.

జైహింద్.

పురాణ న్యాయమీమాంసా. ... మేలిమిబంగారం మన సంస్కృతి.

జైశ్రీరామ్.

 శ్లో.  పురాణ న్యాయమీమాంసా - ధర్మశాస్త్రాంగమిశ్రితాః |

వేదాః స్థానాని విద్యానాం - ధర్మస్య చ చతుర్దశః ||

(యాజ్ఞవల్క్య స్మృతి)

తే.గీ.  మహి పురాణాళి, న్యాయ, మీమాంస, మరియు

ధర్మ శాస్త్రాంగములును, వేదములు నాల్గు,

స్థానములు పదునాలుగు ధర్మపథము

లరయ మనలకు నెఱుఁగుమో నిరుపమాన!

భావము.  1. అష్టాదశ పురాణాలు, 2. తర్కశాస్త్రము, 3. మీమాంసా, 4. మనుస్మృత్యాది ధర్మశాస్త్రములు, 5. వేదాంగములైన - శిక్షా, 6. కల్పము, 7. వ్యాకరణము, 8. నిరుక్తము, 9. ఛందస్సు, 10. జ్యోతిషము, 11. ఋగ్వేదము, 12. యజుర్వేదము, 13. సామవేదము, 14. అథర్వవేదము, - ఈ పదునాలుగు జ్ఞానసాధనములును, ధర్మహేతువులును.

జైహింద్.